11/5/09

Rexistros: llucha escontra la diglosia en tres xeneraciones familiares y lliteraries

I
Mesa navidá

En pasando un par d'hores, la sidre achampanao —perronero— y el vinu portugués que rulaba pela mesa yá calentara los picos abondo como pa qu'empezáramos a picamos. Ye lo que tienen les obligaes xuntances familiares de Navidá. Yo, que yá tenía que tar más que tralláu nestos bailles, nun tuvi que dexar que pasara —non delantre Güelita—, pero cayí otra vez. Tocando les tecles xustes, el mio tíu fue quien a envizcame na llamuerga del bable. Engarrémonos.

Él, falando nun perfectu asturianu y en metá l'aldea, tando a un quilómetru escasu de la so casería, del horru y el güertu qu'heredó del so bisgüelu, razonóme lo malo y lo fato que yera puxar pola nuestra xíriga de probes aldeanos, encamentóme que meyor aprendiere idiomes internacionales que sirvieren pa ganar perres, acusóme de defender la oficialidá por interés económicu personal y, en xeneral, soltóme dafechu la retafila d'ataques anti-llingües rexonales cola que tolos díes lu mayen dende la canal de televisión que tanto-y presta ver (Intereconomía). Los pensamientos ayenos qu'agora-y valen p'afitar l'auto-vergüenza que-y aprendieron de guaḥe, hai cincuenta años, nes llendes físiques del mesmu quilómetru cuadráu nel que charrábemos. De sobra sabía él, cuando lo dicía, qu'una d'eses interllingües de prestixu económicu fálola bien curioso y que nunca nun tuvi negociu o gané un duru con nada averao a la llingua asturiana (1).

EstandoriuEnveredando pel camín románticu que tán inútil ye nestes engarradielles, yo contestába-y que cada llingua guarda un mou d'entender l'universu, que la nuestra ye la única que val pa esplicar el nuestru ámbitu y que por eso tenemos que la valorar. Falé-y de los nomes qu'él y la so madre daben a les coses del nuestru mundu (fechu, hacía cinco minutos, de xigales, orpín y refalfiu). Falé-y del auto-odiu inxertu na so personalidá, de como-y lu aprendieron por fenómenos d'aculturación que, na nuestra historia familiar nun tienen nin gota de metafísico: conoz él bien d'anécdotes y asocedíos que, vivíos y contaos en primera persona, pasemos de padres a fíos como exemplu del como la nuestra naturaleza rural y asturfalante ye estigma vergonzosu na ciudá y la modernidá.

Pero nun fue la engarrada lo importante, lo que me quedó pa siempre, d'aquella nueche. Dende l'otru llau de la mesa, Güelita bullía malagusto na siella.

Dándo-y dacuando un sorbucu al so vasín de moscatel, sentía en silenciu les faltosaes que fíu y nietu dicíemos. Entós, espetando les sos neñines nes míes, colos sos güeyos color miel dalgo enchispaos pol alcohol pero con una mirada dura y intelixente, dixo —nun tonu baxu, tranquilu y repunante, con esa autoridá que namás tienen les güeles bonales—:

 —Paezme bien que fales asturiano, fiín, pero has facelo bien: nun digas ámbitu.

Con esa risina nos llabios que tien el que fizo una maldá adrede, pegó otru sorbín al moscatel. Güelita quixo mancáme y mancóme. Ye un mou vieyu d'aprender.

Yo callé. Per dientro, pruyíame falá-y del necesariu usu de cultismos y tecnicismos nes llingües normales, de rexistros baxos y altos, de cómo s'arrequexó históricamente la nuestra fala a lo rural hasta convencemos de que nun valía pa otra cosa, de cómo pertenezo a una xeneración d'asturfalantes qu'entró ensin torgues en tolos niveles educativos y económicos de la sociedá, d'altor lliterariu... Pero callé. Porque, nel fondu, supi qu'ella tenía razón.

Supi que dicir esa pallabra nesi momentu, na mio casa y delantre Güelita, fala en realidá de los mios años d'educación —d'indoctrinación— n'instituciones castellanofalantes, fala del pesu que tienen les mies llectures d'adultu y los medios de comunicación na verdadera cadarma del mio pensamientu; esa que, fecha con munches cibielles que nun ñacieron nesti quilómetru cuadráu, yá nun ye a esplicar esti universu d'un mou curiosu. Foriatu de mio mesmu.


II

MadreñesLa xeneración de mio güela fue la primera en conocer, yá de bien mayor, la ciudá. En realidá, nunca nun salió del güertu y del prau, pero conocióla. Viéronla cuando, de rapacinos, andaben de madreñes siete quilómetros cola burra pa vender na plaza lo que, pa ellos, yera lo más preciao del mundu —pataques, fabes y fréxoles; limones, ñisos y piescos—; cuando Padrín, que yera xófer de tranvíes, traía per casa dalgún xuguete o revistuca; cuando suañaben con dexar de llendar embaxo l'orbayu y ganar perres pa mercar un coche y un traxe de categoría. En cuantes llegaron ellí y llevaron los primeros focicazos, aprendieron la vergüenza de ser lo que yeren: asturianos.

Xixón 1925

La segunda xeneración, la de los sos fíos, tuvo la oportunidá de ser normal. Fue a estudiar y fizo la mili nel sur. Colocáronse bien, aprendiendo a callar siempre'l secretu y vergonzosu orixe: la quintana, el pueblu, la mina. Con too, esa naturaleza siempre esistió, siempre asomó la patuca y, pa dellos, cuando-yos traxo vergüences per fuera tamién-yos traxo un arguyu secretu, que guardaron no más fondo les coraes. Hoi, nengunu dellos vive na ciudá: cuando pudieron, volvieron al prau maternu. Prefieren andar 30 quilómetros en coche hasta'l trabayu tolos díes qu'añerar ente fumu y formigón.
La tercer xeneración, la mía, apurrió l'espeyu a esta historia. Fitada nel trabayu de l'anterior (que fuera la primera qu'entró na universidá y que vió esi espeyu), púnxolu na antoxana la casa pa que güelos y padres se miraren: dellos siguieron refugándose a sigo mesmos, dellos volvieron a reconocese.
Xente mozo
Yo que Güelita volvió a reconocese. Anque les mancadures dexaron señal, a ella (que, como toos nosotros, ye tovía la rapacina que fue, aquella qu'andaba a mores cuando sintió per primer vez el ruíu del motor d'un avión bombarderu) présta-y que yo puxe polo asturiano, que fale con arguyu la so fala y que nunca más nun quiera tener vergüenza. Véolo en too. Cuando me cuenta histories de los sos mayores, cuando m'enseña pallabres pa que nun se pierdan. Vilo cuando, enantes d'una de les últimes procesiones pela Cai Uría, cosió la bandera d'Asturies na vara d'ablanu que cortara'l mio padre.

La primera y la segunda xeneración tán vives. El so "viaxe diglósicu" nun terminó, camuda al mesmu tiempu que'l míu propiu. Yo quiero entornalu dafechu. Ellos y elles —dellos y delles: los que yá nun s'odien— tamién. El camín ye'l mesmu dende cuantayá y nun lu entamemos nosotros. Por eso ye importante nun olvidar esi principiu: si lu escaecemos, si lu tracamundiamos, perderémonos nosotros mesmos.


III

MontePaezme que yera Milio Rodríguez Cueto'l que dicía, non ensin humor, que l'asturianu yera oxetivamente la llingua más guapa del mundu porque yera la única que tien una pallabra pa toes y caúna les coses que n'Asturies hai. Y ye verdá. Nun ye grandonismu, ye que de verdá los asturianos y asturianes falaron y falen de too lo posible al traviés de la so ferramienta llingüística. De la ñube, la guerra, la pación y l'amor: de tolo qu'hai y pue haber.
Hai una pallabra asturiana pa dicir ámbitu na nuestra casa, delantre la nuestra güela.

Al tiempu, la fala ta viva y l'universu cambia. Apaecen güeyaes nueves que necesiten nomes nuevos. Hoi, nun ye posible falar de Teoría de la Ciencia ensin dicir paradigma, nun se pue falar de pensamientu ensin sinapsis, de socioloxía ensin contestu nin de sociollingüística o lliteratura ensin mentar rexistros.

Pero pal mieu, la dulda, la gayola y el querer, en tolos moos y graos que puen sentise, hai pallabres tan vieyes como los montes. Ye normal que'l falante patrimonial, cola historia diglósica que vivió, nun se reconoza al sentir dellos usos de la so fala lloñe del so mundu —n'ámbitos técnicos, estraos de neoloxismos, préstamos d'otres llingües y cultismos—. Que tenga el mesmu sentimientu cola lliteratura que ñaz d'esa mesma fala o col so usu nos medios de comunicación, non. Nesos llugares, el rexistru perfechu, el puyu nel qu'ha fitase siempre la llingua ha ser la fala patrimonial de la que ñaz.

Xeneraciones
De la rellación ente llingua estándar, rexistru estándar y lliteratura d'anguaño, sal la llingua del futuru, l'asturianu qu'han heredar les prósimes xeneraciones. Sabíenlo bien los pioneros escritores del Resurdimientu, criticaos a lo último —a veces, refugaos con despreciu— polos sos hiperasturianismos, arcaismos, mestura dialectal, temática autorreferencial y búsqueda d'un estándar con identidá dixebrada. Dende'l puntu de vista históricu, la so escritura fue lóxica y necesaria. Había que garrar identidá cultural, voz propia y arguyu, al empar que se defendía lo vieyo, lo de fondu raigañu. Ficiéronlo pero, con too, el rexistru lliterariu acabó demasiaes veces —hai que lo reconocer— en un discursu tapecíu y lloñe del falante.

La segunda xeneración quixo defendese como una lliteratura d'altor internacional capaz de falar de cualquier cosa con esa ferramienta llingüística. Trabayaron elGrandiella rexistru con procuru y, en dos décades, dieron con un estándar lliterariu creyible —que s'asemeya y debe muncho más de lo que piensa al rexistru anterior—, mui aceptáu en xeneral polos falantes y esitosu enforma no lliterario: entra en cualquier campu semánticu y usa cualquier preséu técnicu dende un mou d'entender l'universu —esto ye, un códigu llingüísticu— asturianu dafechu. Anque más que de cambéu de xeneración, igual habría que falar de cambéu de paradigma —munches persones escribieron dende los dos llugares—, esti grupu d'escritores sí s'enfotó en llegar a esi rexistru arrémente, n'usar la llingua nos sos sentíos patrimoniales anque tuvieren rozando terrén virxe. Por ello, somos quien a allugar nel mapa de la realidá más palpuñable'l so inventáu Grandiella, a falar en chigre col Orlando que llevaba una camiseta del Kill 'Em All mientres sacaben al so hermanu del pozu, a ver el color del sable na Kano africana o a sentir a Encarnación de la Fonte repetir aḷḷicuḷḷó na corrada.

Nes mies manes tengo una de les meyores noveles de la tercer xeneración —la más nueva, la que conoció a Nick Cave y a David Lynch pero yá nun fundió les manes na tierra moyao (2)—. Tampoco nun fai falta que yo-y dea esi títulu (dó-ylu): carrétalu tatuáu en llombu dende enantes de ñacer y yá falen d'él como exemplu de la lliteratura asturiana del futuru. Razones lliteraries hailes abondo, como l'ayalga técnica que descubre nel usu de la voz narradora, l'enguedeyau desenguedeyamientu del argumentu al traviés del esamen emocional y el talentu brillante col qu'ata'l destín d'estes xeneraciones que, xuníes, afuxen de sigo mesmes. Gran obra. Con too y con ello, déxame un tastu raru...

Doime cuenta de qué pasa en lleendo na portada una pallabra que me lleva a aquella nueche d'iviernu. Estes páxines danme una sensación asemeyada a otra que yá sintiera antes, pero al revés: un Síndrome del Doctor Mateo voltiáu. Nesa serie de televisión, dícenmos que los personaxes son asturianos, asegúrenmos que tan cabo'l Seya, vémoslos echar culinos en chigre, calzar madreñes y curiar xates, pero... cuando falen, l'universu mesmu rincha. Too nesa serie ye falso y mentira: antroxu fuera, "auténtica impostura".
Ser y tar: To BeNun ye esaxerao dicir que cada llingua llenda un universu dixebráu, ye lliteral. Cuantayá que los psicólogos saben que les estructures llingüístiques formen les del pensamientu mesmu, eses coles que'l ser humanu fai'l so mundu y, pela contra, qu'eses estructures cognitives tresmítense de mou llingüísticu. Entós, la verdadera diferencia ente llingües nun ta —como piensen dellos filólogos— na fonética/fonoloxía, na morfoloxía o la sintaxis: ta nel universu que guarden. Pa un falante nativu d'inglés nun hai dixebra ente ser y tar, dalgo que los asturfalantes nun seremos nunca a pescanciar y que tien que camudar dafechu'l sentimientu mesmu d'esistencia; d'igual mou, por munchu enfotu que pongamos, nun vamos ser a esplicá-y a un falante nativu de castellanu les llendes del color roxu —esi que va dende'l "pardo" de los felechos n'iviernu, el "ocre" o "naranja" del pelo d'un raposu, al "dorado" o "rubio" de les barbes d'una panoya—. El llau semánticu ta siempre pegáu al ser (o al tar).

Abro una páxina al debalu. 16 y 17. Una neña esguila'l tueru vieyu d'un carbayu y mete'l pie nuna fonte: "cumpli'l ritual qu'íntimamente autoimpuxera". "Ye consciente, a cuenta de la inestabilidá territorial que caracteriza a la so familia, de la fugacidá de les coses". Les frases dícenme que ye lliteratura n'asturianu, asegúrenmelo, pero'l rexistru llévame a un universu semánticu mui lloñe d'esi carbayu, d'esa fonte y de los sentimientos d'esa rapacina. Al llau, munchos de los tan criticaos testos de los 70 y los primeros 80 suenen verdaderos, xenuinos, como sólo pue sonar l'usu llingüísticu d'una persona qu'aprendió'l mundu n'asturianu. Falo, sobre too, del rexistru qu'atopamos en xente como Carlos Rubiera, Roberto González-Quevedo o hasta d'Andrés Solar. Al llau, el de la segunda xeneración rescampla por llimpiu y trabayáu, capaz de ser cultu y d'altor artísticu (3) al traviés del pensamientu patrimonial. Si la llingua y la lliteratura —esto ye, el rexistru estándar y lliterariu— del futuru, de la tercer xeneración, nun ye a quien a upase a esi altu ensin perder la comunicación cola primera, a sentase na mesma mesa y reconocese ensin abusar de rexistros cultos que sustituyen a los patrimoniales, yá nun ye la so heredera. Nun paga la pena.

Espeyu
El tema d'esta novela ye'l tema central de tola lliteratura asturiana, el mesmu ciernu de la nuestra personalidá anguaño: el procesu de refugu a lo que fuimos, d'escaezu de lo que somos y la torna al raigañu como únicu camín pa etendenos. El mundu rural que desapaez y dexa a la persona moderna esnortiada. Ayeri, una esperta xulgaba la dixebra qu'amuesa ente'l discursu pretendíu (la confesión de los sentimientos más fondos y xenuinos d'esa persona) y el discursu real (estráu de cultismos, neoloxismos y referencies metalliteraries) como una metáfora del estremamientu ente'l personaxe y el so raigañu. Ye posible, pero tengo mieu de que, en realidá, seya una metáfora de la distancia ente la escritora que siente y la escritora qu'escribe; ente persona y llingua.
Sé que les más (persones) de la xeneración lliteraria más moza, comparten la esmolición pol rexistru (4), sé que viven y trabayen conociendo nelles esta llucha llingüística ente neoenculturación y tradición. Que quieren caltener l'universu que guarda la llingua qu'heredaron, facer que les xeneraciones del futuru sientan el burbús de los montes nel sangre de la so llingua, como nosotros lu sentimos. Pero parte d'esta xeneración cien por cien billingüe yá nun siente llucha dala: remana dos llingües pero sólo ve un mundu.

La mio xeneración diz ámbitu delantre la güela y cuésta-y atopar una espresión curiosa pa dicir, qué se yo, auténtica impostura o incoherencia que despersonalizaría (páx. 22), cuando fala de sigo mesma. Ventitantos años d'escolarización y televisión castellanofalante, de Cortázar y Panero, de traducciones foriates de Yourcenar, Beckett y Cunqueiro. Demasiaos praos daos a monte y demasiaos cultismos en celebru. Mírome al espeyu de los güeyos color miel de mio güela y confiésome pecador.


(1) Y si lo ficiere, ¿qué?. Repúname ver que la defensa del escaecimientu de la propia llingua por falar una grandona que dea perres —como l'inglés— siempre va xunto al tarrecimientu a ganar dineru usando la propia llingua materna: l'odiu nun sabe de razonamientu lóxicu.

(2) Polos versos xeniales de Xabel Vegas.

(3) Dicía Pablo Antón Marín Estrada —seguro, unu de los poetes más brillantes que diera l'asturianu— que-y repunaben "los escritores pedantes, los transcendentes y aquellos que-yos presta más marear al que llee que fala-y claro y conta-y les coses que de verdá importen na vida de cualquier ser humanu". Toi d'alcuerdu.

(4) Nun falamos d'estilu (l'arte col que se remana la llingua), sinón de rexistru (el nivel llingüísticu al que s'usa la llingua).


12 comments:

  1. El xanu\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\November 5, 2009 at 4:59 PM

    Una cosa se saber asturianu, col mundu conceptual y referencial que representa, y escribir nél, y otra saber castellanu, inglés, etc. y los mundos conceptuales y referenciales que representen, y dempués escribir n'asturianu traduciendo.
    Una cosa ye falar asturianu (incluyendo los niveles d'amestáu) y escribir nesti idioma, y otra cosa ye nun falar una pallabra nesta llingua, a costa fecha, nin siquiera nos círculos más propicios, y namás qu'escribila.
    Una cosa ye refugar los rexistros populares de la llingua oral asturiana, tachalos de "incultos" y crear "llingua culta basada notra llingua culta anterior nunos pocos años, y asina sucesivamente" y otra respetar, esforzase por conocer y, en definitiva, beber d'eses fontes de la llingua oral.
    Una cosa ye usar l'asturianu siendo fiel a la so estructura, pallabreru, xiros, refranes, etc. y normalizala partiendo d'ehí "independientemente de que s'entienda o non dende ámbitos castellanistes", y otra adaptar la llingua asturiana pa que "seya fácil d'entender" pa les xeneraciones nueves más castellanizaes, anque los vieyos de casa nun entiendan gota nin se reconozan nella.
    Una cosa...etc...etc...etc...
    Un saludu.

    ReplyDelete
  2. Teo 17 años, soi asturfalante, y lo más probable ye que sía de la xeneración siguiente a la tuya. Nuna familia asturfalante, nun adeprendrí castellán fasta los 4 años qu'entamé a dir pa escuela. A los 12 tuvi un esconsoñar llingüísticu y con arguyu pedí a los mios pas que me dieren permisu per escrito pa dir a clases d'asturianu nel mio colexu.
    Dende aquella la mio mente españó n'alcordanza. Pallabres, conceutos, espresiones, tornaren a la mio tiesta y de la mio llingua xurdieren nuevamente.
    Defendo esta llingua como parte de mio mesmu, y cuidome mui muncho d'emplegar el castellán (o empréstamos d'esti) delantre de les mios güeles.
    Consiguí, xunta la mio ma y dalgún tíu, que les mios güeles s'autoreconocieren; y agora, critiquen con arguyu a los "reporteros" madrilanos de la TPA que malempleguen la nuesa llingua diciendo "mucho", nun pronunciando la "elle" (o la l.l una d'elles ye de Quirós), nun pronunciando la "xe"... etc.
    Inda queda muncho, pero l'esfuerciu personal de caún de nós na dignificación del idioma dientro la familia ye un pasu p'alantre. Un saludu!!

    ReplyDelete
  3. Namái pueu dicite que prestome abondo'l to artículu, atopar estes coses na rede mos fai a la xente qu'atalanta del mesmu xeitu que tú, escaezer lo murnio del nuesu país, de les costumes 'anti-nós mesmos' que mos ficieren deprender dende neños, seyamos de la xeneración que seyamos.

    ReplyDelete
  4. Claro que nun ye lo mesmo, Xanu, pero nesti mundu que desapaez una de les coses que veo esbarrumbar ye la muria ente eses coses. Vien bien recordales.
    > Pelayu: préstame muncho sentir lo que dices y enfótote nesi camín. Nun toi seguru, de toes formes, que seya la norma.
    > Alex: Munches gracies poles tos pallabres. El güeyu que sólo se ve a sigo mesmu ta enfermu, pero'l güeyu que nun sabe qu'esiste, nun pue ver.
    Un saludu.

    ReplyDelete
  5. El xeriff de CasomeraNovember 9, 2009 at 4:46 PM

    ¿De que val tener una llingua normativizada cuando los guah.inos pela cai llamen yayo al güelu y dicen ensin pensalo "he dicho"?
    ¿De que mos sirve falar n'asturianu dende la primera pallabra si nel mesmu intre qu'entames a clase apréndente a falar "bien" por munchu asturianu qu'haiga nel colexu?
    ¿Como una moza que crióse tola vida nel monte, que de puertes pa dientro fala l'asturianu mas perfeutu que pueas oyir avergóñase de esa llingua y merca'l pan en castellán?
    ¿Por qué cuando dices préu, nuiche, chover o pirru la xente, la mesma xente que presume d'asturiano mírate como si te pasara daqué malo na boca? ¿Por qué dame la sensación de que en Vil.lablinu fálase meyor que en Mieres y por qué falo meyor n'asturianu pero lleo meyor en castellán?
    Y la entruga mas importante: ¿Por qué esta vergoña de nos mesmos? ¿Por qué en paises como Cataluña esi arguyu cola so llingua y nos esi despreciu a lo nueso?
    Demasiaes entruges, meyor marcho a vivir a Miranda.

    ReplyDelete
  6. Qué razón tienes, xeriff. Depués d'un asocedíu que tengo frescu d'esta mañana -yá lu contaré per equí un día d'estos-, vengo con munches entrugues como les tuyes na tiesta y delles mancadures nel corazón. Pero de mano, téngolo claro: si pensaben qu'embaxo esti pesu y esta violencia cultural simbólica, los falantes díbemos gachar les oreyes, zincar la rodiella o colar, equivocáronse. ¿Vergoña? yá non, nunca, enxamás. Resistir, lluchar y vencer.

    ReplyDelete
  7. Estrictamente falando, non, yo nun soi asturfalante de ñacimientu, pero tampoco soi castellanofalante. Yo nunca pronuncié una "Xe", pero tampoco salió pela mio boca un "He dicho", sinón que na mio fala, esiste la "gente". Y el "YE".
    Na escuela, y n'institutu, adeprendiéronme bien qu'esto ye falar mal, y d'aquella, creílo. Naide dixo lo contrario. Yo mesmu fici risión davezu de los que falaben mal. Nun albidrará'l porqué diben menti-y a un rapacín nestos temes.
    Por embargu, yá tenía dubies a la fin d'aquella dómina, porque cuando afondaba na mio familia alcontraba señes d'identidá estremaes enforma de les que decíen, nun yeren más daqué mal fecho. Costóme esbrexar con xeitu pa axuntar tolos puntos y esperiencies que dan xacíu al nome d'esti blogue, porque, dempués de too, sí pronunciaba la "Xe".
    Tuvi d'adeprendelo, y sigo con ello, too otra vegada [escribir, lleer, falar...y como se diz nel testu, la conceición l'universu] al empar que desaniciaba tolo demás. Nun ye chancia.
    Y entiendo'l mio papél anguaño, que ye lo más importante. Asina, nun me da vergoña falar, que me dió, pero hai facelo y puxar pola Causa como un samurai siente'l bushido
    Güei, entrara nuna tienda, y falando n'ástur-llionés, cuasi ensin decatame d'ello, dizme la dependienta -"¿Hablas gallego?".- A lo que-y retruqué, bien alto, sonrisa na cara y como na escena final de Robocop "-Non, Asturianu.-"
    Tentái de facelo con tola normalidá'l mundiu.

    ReplyDelete
  8. ¿Vergoña? Viví de los cuatro a los ocho con eso. Pero acabóse, dende qu'entró aquella profesora en clas y dixo "lengua asturiana" esconsoné. Resuta que nun falaba mal, que la mio güela, que yera asturiana, falaba n'asturianu y qu'eso yera una LLINGUA. Resulta qu'atopé un llibrín en casa esi mesmu día que ponía "Normes Ortogáfiques" y que yera d'una tal Academia de la Llingua Asturiana.
    Yá ta, aquello de lo que tuvi siempre esi arguyín sentimental que nun amosaba a naide, camudó a ser LLINGUA. A ser daqué p'amosar con tol arguyu del mundu. Dende aquella enxamás naide foi quien a volver a insulcame esa vergoña. Yá nun la teo. Emplego l'asturianu ensin querer en dellos llaos y teo la suerte d'entrar na panadería o na frutería'l mio barriu d'Uviéu, dicir daqué n'asturianu y que me respuendan na mesma llingua.
    LA LLINGUA SÁLVASE FALANDO!
    Un saludu!!

    ReplyDelete
  9. Pa mi qu`esti tipu de coses pasaronnos a cualquiera.
    Yo alcuerdome como si fuera agora de corexir a mio pa con 11 años. Ye de vergoña, y quedome bién grabao, pero ye verdá.
    Que l´asturianu salvase falando, y si se fixera asina l`estaturu, la oficialida, la dignida y tolo demas venía rodao ye una verdá como un puñu.
    Pero tambien ye verdá que nun ye tan facil y que depende muncho del ambitu y de les persones con les que tes falando.
    Va unos meses contabame una collacia que trabaya en Cataluña dende va poco, qque en Cataluña nun ye como equi; elli ccuanto mas "pijos" mas falen catalán.
    De primeres dices; ¿que coyones me tas ccontando? ¿que tien de bueno eso?
    Llueu pienseslo y daste cuenta por muncho que te h.oda que ye bien importante. Non porque lo falen los pijos. Polo que quier decir de non vergoña, d`orgullu y del emplegu del catalán en toles estayes de la vida.
    Equi, tamos entamando la hestoria. La xeneración d`asturfalantes, o defensores del asturianu, o como queráis llamalo, que tienen dellos trabayos ye nueva. Cada añu mas numerosa pero nueva.
    Prueba dello ye qua a la xente enta choca que dar con un medicu, un abogau, un catedraticu "asturchale" como fatamente dicen dalgunos.
    Ye cuestión de tiempu, y de ver si da tiempu y si tamos a tiempu.

    ReplyDelete
  10. El prestixu social d'una llingua namás s'algama enxertándola n'ámbitos (!) de prestixu. Pero, de mano, el nuestru idioma sigui torgáu dafechu nos medios de comunicación, que son los qu'esparden y afiten los roles culturales na sociedá d'anguaño, polo que los falantes nun tienen modelos curiosos de xente qu'use la llingua en cualquier situación -non sólo en temes "llinguocéntricos" o arreyaos a la cultura tradicional y rural-, nun tienen modelos qu'ayuden a estrapallar la visión del asturianu como "estigma rural". Y lo malo ye que la diglosia camuda rápido en violencia simbólica. Yo veo davezu exemplos de violencia llingüística mui dura fecha sobre dellos profesionales que, como los que mentes, faen por usar l'asturianu en situaciones sociales onde'l non usu del castellanu ye tovía una marca. Seguru que más d'unu de nosotros la sintió na pelleya.
    Sicasí, equí falábemos de como les interferencies llingüístiques ente distintos idiomes que tán nesa situación diglósica van acullá de lo léxico y lo gramatical. Pinga que pinga, furen nel alma.

    ReplyDelete
  11. ¡Emocionasteme col artículu! :')
    Sinceramente blogues como esti enaltecen la blogosfera n'asturianu a un nivel únicu.
    Les mios felicitaciones por facer un de los meyores blogues del nuestru país.
    Un abrazu fonderu y si vas a La Pola sería un placer conocete :)

    ReplyDelete
  12. Emocionante, sí señor.

    Na parte "técnica" y menos emotiva del problema, creo que damos de frente cola cuestión de los "rexistros", efectivamente. La manera de falar con güelita tien que ser un rexistru asturianu, pero non un rexistru escolar o cultu. Asturianidá lingüística nun quier dicir "rexistru académicu", que ye la única manera de ver y conocer la llingua que paez que tienen dellos. El dominiu de cualquier llingua ye'l dominiu de los sos rexistros expresivos. Y el nuestru rexistru familiar (el más importante, en contra de lo que nos quieran facer crer) tien que ser el qu'empate más directamente cola tierra, col saber de los antiguos, cola memoria familiar, cola naturalidá de la expresión de los nuestros. Con to güela, por resumilo nuna palabra que simboliza muncho más qu'otra cualquiera. Les palabres "cultes" (valga la expresión) sobren nestos casos. Y ehí ta una parte del problema. La principal, con seguranza.

    Déxame, de toes maneres, que toque la otra parte del problema que yo polo menos veo, más allá de los rexistros, pero en relación con ellos. Na parte central d'Asturies (que ye onde pasa esta historia) hai palabres qu'a "los del bable" dixéronmos que yeren toes con -U y que los nuestros paisanos, les nuestres families dicen siempre con -O. Y una d'eses palabres ye ÁMBITO, que sin ser una palabra "normal", nel asturianO de la xente del centrO d'Asturies, dizse con -O siempre que toque dicila. Y lo mesmo te digo del horrO, del fríO que fai, del asturianO, del castellanO y del mundO. Si vamos diciendo eses palabres cola -U d'unes normes académiques que nun sé en qué fales se basarán (pero nes del centrO seguro que non, anque presuman d'ello), lo que vamos sacar ye lo contrario de lo que que queremos al falar asturianO: estrañamientu, desconexión y falta d'empatía. Los nuestros güelos nun van dexar d'entendemos, claro, pero van vemos como lo que munches veces somos: unos bichos raros, más castellanizaos qu'ellos, que quixeron facer el camín de vuelta a la fala de casa (qu'heredemos más probe y deturpada que la d'ellos), y qu'al final nun acertaron y pasáronse con tola so bona voluntá, enllenaron el so idiolectO personal de us y depués vinieron con esi falaxe nuevu a enseñalu en casa, y amás a usalu como si fuera la fala de siempre. Como un "okupa" forasteru y urbanita nuna casería. Que fala'l to idioma, sí, pero que nun dexa de ser un "okupa".
    Y d'esa manera nun vamos acabar de facer esi "camín de vuelta" que pa munchos de nosotros supón una parte importante de la nuestra propia supervivencia personal y social. Si na escuela nos aprendieron a trabayar col ordenador, hai que saber volver a casa, dexar el portátil en cabás, salir a la llosa y garrar la fesoria. Y cuando pisemos esa cosa tan rara con dientes y mangu llargu, saber caganos en garabatu de Dios... ;-)

    Un saludu.

    ReplyDelete